Donasyon para sa online benefit concert matumal na; Kapamilya stars problemado pa rin

Coco

NAGING abala ang maraming performers natin sa on-line concert. 

Kabi-kabila ang palabas na ang kinikita ay ipinangtutulong sa ating mga frontliners.

    Nakasuwerteng makauna ang iba, pero ang mga nahuli sa pagkilos ay hindi na masyadong nakalikom nang malaking halaga, ganu’n nga yata talaga ang kalakaran.

    Sa una lang mainit ang pagsuporta, pero kapag nagkatusak na ay wala nang interes ang iba, bumibitiw na sila.

    Problemado pa rin ang mga artista ng ABS-CBN, nakalutang pa rin sa hangin ang kanilang pag-asang makapagbukas uli ang kanilang network, ngayon pa lang inuupuan ang usapin tungkol sa prangkisa ng istasyon.

    Babalik na ang “Ang Probinsyano” ni Coco Martin pero hindi naman malawakang mapapanood ‘yun dahil sa Jeepney TV lang muna ipalalabas.

    Napakasaklap ng nangyari para sa mga artista at empleyado ng ABS-CBN. 

Pagkatapos ng lockdown ay may binalikan pa ang mga manggagawang Pinoy pero sila ay namamana pa ngayon sa dilim.

    Tama lang ang kanilang ginagawa na maging abala muna sa iba-ibang paraan sa social media. 

Para hindi sila makalimutan ng publiko. Mahirap na nga naman ‘yung nananahimik lang sila.

    Dalawang bagay ‘yun. Ang sobrang ma-miss sila ng ating mga kababayan o ang tuluyan na silang makalimutan.