Fans ni Alden gustong sapakin, sampalin si Martin del Rosario

UNTI-UNTI nang nakakabanaag si Sep. Kahit paano’y nakakaaninag na siya. Pero kung bakit kung kailan naman siya nakakakita na ay saka naman humina ang pagpasok ng kanyang mga pangitain.

Palalim na nga nang palalim ang daloy ng kuwento ng The Gift na pinagbibidahan ni Alden Richards. Nakapanghihinayang nang palampasin ang bawat episode nito dahil sa bilis ng mga pangyayari.

Habang hinahangaan sa kanilang komunidad si Sep na dinadagsa na ng mga magpapagamot at magpapahula ay pasama naman nang pasama ang role na ginagampanan ng magaling na aktor na si Martin del Rosario.

Dahil sa sobra nitong pangangawawa kay Sep ay gusto itong regaluhan ng mga suntok at sampal ng mga fans ni Alden. Ganu’n kaepektibo ang kanyang pagganap, napapagalit nito ang mga tagahanga ni Alden, pati ang mga sumusubaybay sa serye.

Kuwento ng kaibigan naming si Liza na silent supporter ni Alden, “Ibang-iba na ang acting ni Alden ngayon, very effective na siya, hindi na basta papogi lang ang pag-arte niya.

“Saka maganda ang atake niya, subdued acting lang, galing sa puso, kaya makikiiyak ka na lang sa panonood sa kanya. At napakaguwapo niyang bulag!” parang kinikilig pa nitong sabi.

The Gift!