Eddie Garcia binigyan ng ‘military honors’ ng Philippine Army

BINIGYAN ng military honors ng pamunuan ng Philippine Army ang namayapang veteran actor na si Eddie Garcia sa memorial service na ginanap sa Heritage Park, Taguig City.

Nag-vigil kagabi ang isang grupo ng mga sundalo sa lamay kasabay ng paglalagay ng bandera ng Pilipinas sa harapan ng urn na naglalaman ng abo ni Manoy.

Sa mga hindi pa nakakaalam, naging bahagi ang award-winning actor-director ng Philippine Scout troops na na-deploy sa Okinawa, Japan noong kasagsagan ng World War 2.

Ayon sa anak ni Manoy na si Erwin Garcia, ang military experience ng kanyang ama ang naging dahilan kung bakit nais nitong isabog sa karagatan ng Manila Bay ang kanyang abo kapag namatay siya.

“His deployment ceremony was held in Luneta, that was why he wished his ashes to be scattered in Manila Bay,” ang bahagi ng naging pahayag ng Philippine Army base sa pagkukuwento ni Erwin Garcia.

Ayon pa sa pamunuan ng Philippine Army, noong nabubuhay pa ang aktor ay aktibo itong tumutulong sa kanilang mga proyekto bukod pa sa pagsali sa kanilang mga shooting competitions.

Sabi naman ni Army’s spokesperson, Lt. Col. Ramon P. Zagala, ang sinasabing final wish ni Manoy na isaboy ang kanyang abo sa Manila Bay ay,l “speaks of his love of the noble profession of arms, despite his short-lived military career.”

“The Philippine Army condoles with the family of the late Eddie Garcia. We admire him not only as an actor but as a fellow comrade-in-arms,” sabi pa ni Zagala.