John Lloyd nag-post ng wacky selfie sa Instagram pero binura agad

NA-EXCITE ang mga netizens nang mag-post uli si John Lloyd Cruz ng kanyang selfie photo sa Instagram nitong nakaraang araw.

Sa official IG account niyang @dumpsitegallery, ipinost ni Lloydie ang kanyang wacky black and white photo na pinutol-putol sa apat na parts.

Ang maikling caption niya rito ay “Selfie, 2019.”

Ngunit makalipas lang ang ilang oras ay tinanggal din ni John Lloyd ang nasabing litrato sa kanyang Instagram feed na ipinagtaka ng kanyang followers.

Bago ito, natuwa rin ang kanyang fans nang mag-post siya sa IG after several months ng kanyang mirror selfie sa airport ng Indonesia. Nilagyan niya ito ng caption na, “Pauwi” with shooting star emoji.

Nitong nakaraang linggo, sunud-sunod ang pagpo-post ng ilang netizens ng mga litrato nila kasama si Lloydie na kuha sa mga public places.

Last week din, isang kaibigan nila ang nag-post ng photo ng aktor kasama ang partner nitong si Ellen Adarna at ilang kaibigan sa Bali, Indonesia. Kasama rin nila roon ang kanilang 11-month-old son.

Samantala, lumabas na sa social media ang digital commercial ni John Lloyd para sa isang shawarma brand. Ito ang kauna-unahang proyektong ginawa ni Lloydie matapos iwan ang showbiz noong October 6, 2017.