‘Hellboy 2019’ mas maangas, ‘di na nagtatago sa madlang pipol

HELLBOY

MAGBABALIK na si Hellboy, ang legendary half-demon superhero ay nagbabalik ngayong Abril.

Pero hindi bilang karugtong ng fantasy-heavy “Hellboy” films na ipinalabas noong 2004 at 2008 sa direksyon ng visionary writer/director na si Guillermo del Toro.

Sa halip, ang movie reboot na ito ay mas malagim, kinatatampukan ng mga bagong karakter at binuo ng bagong creative team na kinabibilangan ni Mike Mignola, ang mismong lumikha ng “Hellboy” comic books, na gumaganap bilang co-executive producer.

Sa direksyon ng award-winning director na si Neil Marshall (Dog Soldiers, The Descent, Game of Thrones), at pinagbibidahan ng two-time Emmy Award Best Supporting Actor nominee na si David Harbour (Chief Jim Hopper sa Stranger Things), si Hellboy ay inatasang kalabanin ang naghihimagsik na mga higante sa isang karatig na lupain ng England.

Ito ay bahagi ng kanyang trabaho sa government organization na B.P.R.D. (Bureau for Paranormal Research and Defense).

Habang tinutugis ang mga higante, makakaharap ni Hellboy si Nimue The Blood Queen, isang mapaghiganting 5th century sorceress na nais makuha si Hellboy sa kanyang panig upang wasakin ang sangkatauhan at pamunuan ang mundo.

Sa kabila ng pagpapakita ng pinagmulan ni Hellboy – tinawag mula sa kailaliman ng impyerno at lumabas sa isang isla sa Scotland – ang pelikulang ito ay magsisimula sa gitna ng aksyon.

Ayon kay Mike Mignola, ito rin ay mas malapit sa sinulat niyang komiks kung saan si Hellboy ay hindi nagtatago sa publiko. May angas ang kanyang dating dahil marami na siyang narating at nagawa, isang katangiang hinango ni Mignola sa kanyang ama na lumaban sa Korean War.

Kumpara sa “Hellboy” version ni Ron Perlman, ang “Hellboy” ngayon ay may mas nag-aalab na emosyon. Paliwanag ni Harbour, “It’s a classically complicated hero. He’s a creature that was meant to bring about the end of the world, and he just sort of wants to be a good guy. He’s got that complexity to him.

“He’s also a monster who lives among human beings, so he’s in a sense fighting for human beings against his fellow monsters, and yet the humans hate him because they fear him and they think he’s weird-looking and everything,” aniya pa.

Ang dalawa pa sa mga karakter na ngayon lang lalabas sa “Hellboy” ay sina Alice Monaghan (Sasha Lane ng American Honey) at Ben Daimo (Daniel Dae Kim ng The Divergent Series: Insurgent).

Puno ng nakamamanghang aksyon ang “Hellboy” kaya lubos na naghanda si Harbour para rito. Aniya,

“It’s the most physical role I’ve ever played.” Dumaan siya sa matinding training sa loob ng 10 linggo sa tulong ng Hollywood trainer na si Don Saladino. Ang kanyang workout ay kinabibilangan ng kettlebells, medicine balls, machine weights, dumbbells at weighted sleds.

“I put on a lot of muscle and I got really strong and a lot of the training was power, because there’s a lot of stunts in the movie. There are two amazing Bulgarian Olympic wrestlers who did most of the Hellboy stunts, but there still was a lot of close up stuff that I had to do,” dagdag pa niya.

Inilarawan din ni Harbour ang armas ngayon ni Hellboy, “He’s got this big hand cannon and he’s also got this big Right Hand of Doom, so there’s a lot of big fights and there’s a lot of swinging that big right hand around.”

Showing na ang “Hellboy” sa mga sinehan bukas mula sa VIVA International Pictures at MVP Entertainment.