Magkano ang kailangan nina Ice at Liza para magka-baby?

LIZA DIÑO AT ICE SEGUERRA

HINDI pa naman daw umaabot sa P1 million ang nagagastos ng mag-asawang Liza Dino at Ice Seguerra sa unang phase ng in vitro fertilization.

Sumailalim kamakailan si Ice sa “egg harvesting” na susundan ng fertilized embryo transfer, kung saan ipagbubuntis ni Liza ang magiging anak nila ni Ice sa pamamagitan ng sperm donor.

Ayon kina Liza at Ice, napakamahal ng nasabing proseso. Base sa isang website ang isang Drug Free (Natural Cycle) IVF Cycle ay nagkakahalaga ng P200,000. Kasama na sa IVF package na ito ang egg retrieval/harvesting, IVF with or without ICSI, embryo culture, at embryo transfer.

Bukod pa rito ang bayad para sa pagkuha ng sperm donor, na umaabot sa humigit-kumulang P50,000.

Pero sa ngayon daw, hindi pa umaabot sa milyones ang inilalabas ng mag-asawa para sa magiging panganay nilang baby.

Kuwento ni Liza, nakapili na rin sila ng sperm donor mula sa isang cryobank sa US, “Yes, meron na. Nakita namin yung profile niya. Yung napili namin parang summa cum laude. So more or less, nakilala na namin yung donor.”