TeklaBoo: Hindi kailangang manlait para makapagpatawa
BOOBAY AT TEKLA
NGAYONG gabi na mapapanood ang unang episode ng The Boobay And Tekla Show sa GMA 7. Naging matagumpay ang online version nito kaya nagdesisyon ang Kapuso Network na ipalabas na rin ito sa TV para mas maraming mapasaya sina Boobay at Tekla.
Sinisiguro ng dalawang Kapuso comedian na ibang putahe naman ang ihahanda nila para sa mga viewers tuwing Linggo ng gabi at siguradong matutulog daw ang mga manonood ng maligaya at magaan ang dibdib.
Sa panayam kina Boobay at Tekla, sinabi nilang hindi kailangang manglait at mang-okray ng ibang tao para makapagpatawa o makagawa ng isang nakakatuwang eksena.
Sey ni Boobay, “Walang ganu’n na kailangan may mararamdaman ‘yung isa. Lait-lait, hindi ako naniniwala sa ganu’n. Kasi sabi ni Mr. Allan K, hindi mo kailangan manlait para makapagpatawa ka.
“’Yun ang hindi ko talaga makalimutan na laging nasa utak ko. Hindi mo kailangan magmura para makapagpatawa, isa pa ‘yun. Kahit sa amin na lang (panlalait), yes, kasi magagawan namin ng paraan ‘yan agad-agad.
“At the same time, talagang hindi ka sensitive sa mga ganyan dahil alam mong for the sake of fun, mapasaya ‘yung audience mo, mga manonood,” aniya pa.
Ito naman ang pahayag ni Tekla, “Itong TBATS hindi ito degrading kumbaga. Maraming form ng comedy or maraming style ng comedy na hindi mo kailangang makapanlait to make people laugh, or use people or degrade people or manlait ka para nakakatawa.
“There’s millions, there’s thousands of ideas pagdating sa comedy,” dagdag pa niya.
‘Yan ang sikreto nina Boobay at Tekla kaya patok na patok sa netizens ang The Boobay And Tekla Show sa digital world at asahang mas matindi pa raw ang mga gagawin nila sa pag-cross over nila sa TV.
Sa pagsisimula ngayong gabi ng TBATS, abangan ang nakakalokang “DNA Test” story kasama mismo ang nagpauso nito sa KMJS na si Jessica Soho as special guest host.
Makakasama rin nila sa unang episode ang award-winning kontrabida na si Gladys Reyes sa “Pranking In Tandem” at ang Kapuso hunk na si Derrick Monasterio para sa segment “Pa Boys.”
At siyempre, nandiyan din ang “Bert And Tomas Adventures” at ang trending segment na “Dear Boobay And Tekla.”
Kaya huwag na huwag aabsent sa first day ng The Boobay And Tekla Show ngayong gabi pagkatapos ng Kapuso Mo, Jessica Soho sa GMA.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.