Jinggoy kay JV: Estrada ako, because I am my father’s son!

JV EJERCITO AT JINGGOY ESTRADA

Mabuti naman at napag-isip-isip ni Senator JV Ejercito na tantanan na ang pakikipag-away sa kanyang kapatid na si dating Senador Jinggoy Estrada.

Naamoy na siguro ng senador ang hindi kagandahang imaheng ipinipinta tungkol sa kanya ngayon ng ating mga kababayan. Pa-ringgan ba ang kanyang ka-patid sa mga interbyu?

Sabihin ba naman nitong masamang-masama ang kanyang loob kay Pangulong-Mayor Joseph Estrada dahil hindi na nga raw ito tumulong sa kanyang kandidatura nu’ng nakaraang eleksiyon ay pumayag pa ang kanyang tatay na sabay silang kumandidato sa darating na halalan sa ilalim ng isang partido lang?

Agarang nakatikim ng mga pamba-bash ang may kaangasang senador, sinabihan itong walang utang na loob ng ating mga kababayan, dahil sa pangalang-pangalan pa nga lang namang dinadala nito ay napakalaking tulong na sa kanyang kampanya ng dating pangulo.

Suwabe lang naman ang reaksiyon ni dating Senador Jinggoy sa mga iniaangal ng kanyang kapatid sa ama. Mas mahalaga para sa senador ang pag-iikot sa buong bansa kesa sa sagutin pa ang mga reklamo ng kanyang kapatid.

Sa reklamo ni Senator JV na Ejercito ang gamit nito at hindi Estrada ay isa lang ang makahulugang sagot ni Senador Jinggoy, “Estrada na ang ginagamit ko mula pa nu’ng tumakbo akong vice-mayor. Estrada na talaga, because I am my father’s son!”

Estrada na rin daw ang gagamitin ngayon ni Senator JV na lumipat na ng partido. Pero wala pa rin itong bentahe sa kanyang kapatid dahil “inampon” ng iba-ibang partido si Senador Jinggoy Estrada, mataas ang kanyang numero sa survey, kumpara sa maangal na senador na sabi nga ng aming partner na si Wendell Alvarez sa “CFM” ay nasa page 2.