‘Konting-konti na lang at magiging kapamilya na uli si Kris Aquino!’

DAHIL sa kasalukuyang ginagawang pelikula ni Kris Aquino sa Star Cinema na kapatid na produksiyon ng ABS-CBN ay lumabas ang balita na ilang panahon na lang mula ngayon ay babalik na sa pagpoprograma si Kris sa Dos.

Sana nga, dahil may iniwanan naman siyang marka sa tagal ng panahon ng kanyang pagtatrabaho sa network, naging reyna siya du’n pansamantala kaya hindi imposibleng makabalik siya.

Pero ang kuwentong ‘yun ay kinokontra naman ng mga namumuno sa istasyon, maging ang kanilang mga empleyado ay parang walang kaalam-alam sa kuwento, hindi raw ‘yun napag-uusapan sa kanilang bakuran.

Sabi ng isang source na nakakuwentuhan namin, “Nagtataka nga ang mga executives kung saan nanggagaling ang mga kuwentong ganu’n, kasi, wala namang pinagmimitingang kahit ano tungkol sa pagbabalik ni Kris.

“Wala naman ‘yun sa agenda ng bawat meeting ng mga bossing at production, kaya nakapagtataka kung sino ang nagpapasimuno sa pagkalat ng balitang ‘yun,” malinaw nitong pahayag.

Wala namang imposible. Pagkatapos nang dalawang taon na paghihintay ay gumagawa na si Kris ng pelikula ngayon sa Star Cinema.

Isang hakbang na lang ang layo ng distansiya nu’n sa ABS-CBN, malapit na malapit na, kaya hindi nakapagtataka kung isang araw ay kapamilya na uli si Kris Aquino.