Lalaking natutulog sa studio ng Wowowin nahuli ni Willie

TRENDING ang video ni Willie Revillame at ng tinaguriang “sleeping man” sa studio ng Kapuso variety show na Wowowin.
Mapapanood sa video kung ano ang naging reaksyon ng TV host-comedian nang makita niya ang

natutulog na lalaki habang umeere ang Wowowin.

“Alam n’yo po, matagal ko nang naisip ang title nito, ang Will to Win. Matagal na ito pero I never thought na dito pa sa GMA ito magagawa,” ang bahagi ng spiel ni Willie sa nasabing segment ng Wowowin.

At habang nagsasalita ay napansin ng TV host ang isang lalaki mula sa audience na mahimbing na natutulog. Agad itong nilapitan ni Willie at nakiusap sa mga tao sa studio na huwag maingay at tumahimik nuna.

Dito na nag-dialogue si Willie ng, “Pare, okay ka lang ba diyan? Quiet lang.”

“Pahinging jacket, pahinging cellphone. Huwag niyong gisingin, susorpresahin ko lang siya. Alam niyo, mga kababayan, napagod ang mga tao, ganyan talaga ang buhay.

“Nakakahiya naman, kanina pa tayo dito. Tatlong araw na tayo dito pero nandito pa rin siya.

“Pare, naiintindihan ko naman. Please lang, nagpapahinga ang kaibigan natin,” sabi pa ng TV host habang inilalagay ang cellphone sa kamay ng lalaki. Sa kabila nito, hindi pa rin nagising ang “sleeping man”.

Naalimpungatan lamang ito nang maramdaman nito ang inilagay na jacket sa kanyang harapan. Hiyang-hiya ang lalaki nang makitang nasa harap na niya si Willie na bigla namang kumanta ng “Happy Birthday” song.

Tanong sa kanya ni Willie, “Kamusta naman ang panginip mo, bwisit ka? Habang kami ay nagsisiyahan, ikaw tulog ka ng tulog. Anong gusto mong sabihin?”

Sagot ng lalaki, “Kuya Wil, maraming salamat. Pwede bang matulog?” Na sinundan ng malakas na tawanan ng mga nasa studio.

Binigyan din ng komedyante ang lalaki ng P3000 cash.