Lampas 10,000 nagkasakit sa gitna ng pag-aalburuto ng Mayon

Umabot na sa 10,279 katao ang dinapuan ng sakit sa gitna ng patuloy na pag-aalburuto ng Mayon Volcano sa Albay, ayon sa mga awtoridad. Mula nang mag-umpisa ang pag-aalburuto ng bukan noong Enero 15 ay 6,850 ang nagpakonsulta dahil sa acute respiratory infection, ayon sa datos mula sa Office of Civil Defense-Bicol. Sumunod namang pinakamarami ang 1,363 na nilagnat, 715 na dumanas ng altapresyon, 603 na dumanas ng diarrhea o pagtatae, at 453 ang nagtamo ng pasa’t sugat, ayon sa OCD. Mayroon pang 16,240 pamilya o 62,086 katao sa mga evacuation center, habang 5,627 katao ang nakikisilong sa mga kaaanak o temporary shelters. Umabot na sa 72,166 mag-aaral ang apektado dahil 920 classroom sa 53 paaralan ang ginagamit bilang evacuation center, habang may 65 paaralan ang nasa loob ng 6 to 7-kilometer danger zone, ayon sa OCD.