Refund sa Meralco di pa naibibigay lahat – solon

DAPAT  umanong saluhin ng Manila Electric Company sa halip na ipasa sa kanilang mga kostumer ang nakaambang singil sa kuryente ngayong buwan dahil sa Tax Reform for Acceleration and Inclusion.
Ayon kay Bayan Muna Rep. Carlos Isagani Zarate hindi pa naibabalik ng Meralco ang lahat ng refund na dapat ay ibinigay nito sa kanilang kostumer.
“Marami pa ngang dapat i-refund ang Meralco sa mga consumers. Kasama na dito ang sobrang nasiningil nito noong 2013 Malampaya shutdown na di na ibinalik sa mga nagbayad na consumers,” ani Zarate.
Mahigit umano sa P1.2 bilyon ang dapat i-refund ng Meralco.
“Noong isang taon din ay kumita ng mga P19.2 bilyon ang Meralco kaya, kayang-kaya nito g saluhin ang itataas ng TRAIN,” dagdag pa ng solon.
Ayon kay Zarate ang mahirap sa TRAIN law, ipinapasa lamang ng mga negosyante ang dagdag buwis na ipinapataw sa mga produkto kaya ang mga konsumer ang nahihirapan.
“Kaya naman din hindi nagreklamo ang mga kumpanya noong pinagdedebatehan ang TRAIN. Ngayon, nasan ang mga armchair economists ng administrasyon na nagsabi na di daw mararamdaman ang pagtaas ng bilihin dahil sa TRAIN?” tanong ni Zarate.
Ayon sa Meralco aabot sa P1.08 kada kiloWatt hour ang pagtaas ngayong buwan dahil sa TRAIN at paghina ng piso kontra dolyar.