Chavit Singson mamimigay ng pera, house & lot sa mahihirap sa bagong public service program

SIGURADONG matutuwa ang mga kapuspalad nating mga kababayan kapag nagsimula nang umere ang public service program ni dating Gov. Chavit Singson na posibleng mapanood sa GMA 7 o sa GMA News TV very, very soon. Ang tinutukoy namin ay ang programang Happy Life to be hosted by the former governor with some surprise guest appearance ng ilang personalities na malalapit sa kanya.

Sa panayam ng mga entertainment editors na naimbitahan sa kanyang Balwarte zoo and farm sa Vigan, Ilocos Sur through Tita Aster Amoyo, sinabi ni Gov. Singson na marami na silang natapos na episodes para dito pero kailangan pa nilang tapusin ang kabuuang 13 episodes para sa unang season ng programa bago ito umere anytime this year.

“Weekly ito, at ang talagang objective namin sa show ay para mamigay ng pera, ng tulong sa mga kababayan natin. Actually, matagal na akong tumutulong, pero ang purpose ko ngayon maipalabas ito sa TV at ma-encourage ang iba pa nating mga kababayan to do the same.

“Gusto kong sabihin sa kanila na hindi nyo madadala sa kamatayan ang kayamanan natin kaya dapat i-share sa nangangailangan. Kaya ako balak ko ipamigay lahat ng pera ko. Of course, meron na para sa pamilya ko, para sa mga mahal ko sa buhay pero lahat ng matitira ipamigay ko yan dahil di ko naman madadala, e. Kapag iniwan ko, baka pag awayan pa, e,” pahayag pa ng dating Ilocos Sur governor na batambata pa rin ang itsura sa kabila ng kanyang edad.

“In this show, deserving beneficiaries will be given the chance to travel while surprise gifts await them when they reach their journey’s end, like a house and lot. Yes, we will search for a donor or if we cannot find one, I will provide the prize myself. Through Happy Life, we also want to give a fresh start to hardworking individuals and organizations,” sabi pa ni Gov. Chavit na ngayon ay isa nang konsehal sa Narvacan, Ilocos Sur.

Samantala, mapapanood naman ang bonggang exclusive interview ni Tita Aster Amoyo kay Chavit Singson sa kanyang “Showbiz Express” segment sa magazine program na Gandang Ricky Reyes sa Sabado, 9 a.m. sa GMA News TV.