Lukresyang singer-actress ayaw nang kunin sa kampanya

HINDI na pala kinukuha ngayon ng mga namamahala sa kampanya ang isang singer-actress na produkto ng isang malaking pamilya ng mga artista. Nadala na kasi ang mga ito sa sobrang kaartehan ng female performer.

Hindi lang sa mga ganitong panahon naiimbiyerna ang marami sa singer-actress, kahit sa mga live shows ay bihira na siyang mapanood, umiiwas na sa stress at inis ang mga talent coordinator sa kaartehan ng babaeng ito.

Kuwento ng aming source, “Sino naman kasi ang hindi huhulagpusan ng pasensiya sa babaeng ‘yun?

Ibibigay mo sa kanya ang venue at calltime niya, nagkasundo na kayo sa presyo, sasalang na lang siya.

“Topakin ang babaeng ‘yun! Ang calltime niya, e, alas nuwebe nang gabi, darating siya nang napakaaga, alas siyete pa lang, nandu’n na siya. At ang the height, mangungulit siya na isalang na siya agad sa show!

“May sinusunod na sequence, di ba? Nakaplantilya na kung sinu-sino ang sunud-sunod na magpe-perform. Sinisira niya ‘yun, gusto niyang magpasalang agad, samantalang kaya nga siya kinol nang medyo late na, e, dahil nasa bandang huli na siya.

“Naku, talagang kukulitin niya nang kukulitin ang production, hanggang sa dahil sa sobrang inis, isasalang na lang siya nang mas maaga!” naiinis na kuwento ng aming impormante.

Kailan lang ay tinawagan ng malditang singer-actress ang mga humahawak ng kampanya ng iba-ibang pulitiko, nagpaparamdam siya, nandiyan lang daw siya kapag kailangan ng mga ito.

Sagot sa kanya ng isang tinext niyang coordinator, “Ay, pasensiya na, hindi na masyadong kumukuha ng mga performers ang mga pulitiko, nagtitipid na sila.”

Bradly Guevarra, kilalang-kilala mo kung sino ang lukresyang singer-actress na ito, pinsan siya ng mahal mong idolo!