Top seed sa Final Four seselyuhan ng FEU Tamaraws

Mga Laro Ngayon
(Araneta Coliseum)
2 p.m. UE vs Adamson
4 p.m. FEU vs UST
Team Standings: *FEU (10-1); *UST (9-3); *Ateneo (8-4); La Salle (5-6); NU (5-7); UE
(4-7); UP (3-8); Adamson (2-10)
* – Final Four

OKUPAHAN ang number one seeding bukod sa pagbangon mula sa pagkatalo na ipinalasap sa unang pagtutuos ang nais ng Far Eastern University sa pagpapatuloy ng 78th UAAP men’s basketball ngayon sa Smart Araneta Coliseum sa Cubao, Quezon City.

Kalaro ng mainit na FEU ang University of Santo Tomas sa ikalawang laro na magsisimula alas-4 ng hapon matapos ang bakbakan ng University of the East at Adamson University sa ganap na alas-2 ng hapon.

Ang Falcons pa lamang ang napahinga sa walong koponang liga kaya’t asahan ang balikatang labanan sa mga huling laro sa second round elimination.

Sasandalan ng UE ang magarang 91-77 panalo sa UST sa huling laro para tablahan ang nagdedepensang kampeon National University (5-7) sa ikalimang puwesto.

May 9-game winning streak ang Tamaraws at ang huling kabiguan nila noong Setyembre 9 ay ipinalasap ng Tigers, 72-71. Naging mabisang sandata ng FEU sa pagpapanalo ay ang magandang teamwork at ito ay inaasahang ipamamalas uli para selyuhan na ang number one sa Final Four.

Hindi naman ganoong kadali na papayag ang Tigers na kailangan ang panalo para makatiyak ng playoff sa unang dalawang upuan na may mahalagang twice-to-beat advantage.

Kapag nabigo uli ang UST, lalong titibay ang laban ng Ateneo de Manila University para sa ikalawang puwesto sa Final Four dahil isang laro na lamang ang pagitan ng dalawang koponan.

Ang Ateneo ay makakaharap ang nangangapang De La Salle University bukas at kung manalo sila at matalo ang UST ay magtatabla sila sa 9-4 papasok sa huling laro sa elimination round.