VP Binay nililigawan daw si Ate Guy para makatambal sa Eleksiyon 2016

Si Nora Aunor ang lumulutang sa mga kuwento na nililigawan ngayon ng partido ni Vice-President Jejomar Binay para kumandidato sa darating na eleksiyon. Una ay bilang senadora.

Pero tumanggi raw ang Superstar. Ang sumunod na kuwentong ginawang pulutan ng mga miron ay bilang runningmate naman ni VP Binay. Pinag-iisipan kuno ‘yun ng aktres.

Hindi kami naniniwala na nagpadala ng emisaryo ang partido ng bise presidente kay Nora Aunor, kuwentong-kutsero lang ‘yun, inimbento lang sa madaling salita.

Sa dinami-dami ba naman ng mga personalidad na puwedeng makilahok sa mundo ng pulitika sa susunod na eleksiyon ay si Nora pa ang lalapitan ng partido ni VP Binay?

Pakiramdam tuloy ng mas nakararami ay ginagawa nang komedya ang pulitika, hindi na nagseseryoso ang mga pulitiko, dahil pati ba naman ang pangalan ng Superstar ay nakakaladkad na rin sa senaryo?

Hindi namin minamaliit ang kakayahang magserbisyo ni Nora Aunor, kahit naman sino’y puwedeng magpakita ng ganu’n, pero huwag sanang paniwalain ang publiko na tatanggapin ng Superstar ang pagtakbong kahawak-kamay si VP Binay.

Huwag naman. Huwag si Ate Guy. Nananahimik na ang buhay nu’ng tao, huwag na sanang bulabugin pa ng kung sinu-sino diyan, parang awa n’yo na.