Suko na: Bagets actor nakipag-break sa duderang GF na aktres

MAINIT na mainit pala ang dugo ng isang kilalang young actress sa isang kasamahan niyang kaedad niya sa network na pinagseserbisyuhan nila.

Ang dahilan, pinagseselosan ng young actress ang dalaga, ito raw ang dahilan kung bakit sila nagkahiwalay ng kanyang boyfriend na young actor.

Maraming nagtataka sa inaasal ng kilalang batang aktres dahil wala namang namamagitan sa kanyang boyfriend at sa babaeng pinagseselosan niya.

Kuwento ng aming source, “Naku, ilusyon lang niya ‘yun! Walang katotohanan ang kutob niya na siguro raw, kaya matabang na sa kanya ang boyfriend niya, e, dahil kay ____ (pangalan ng young singer-actress)!

“Napakatindi ng insecurity niya, kahit sino lang na naka-text ng BF niya, e, agad-agad na niyang pinagdududahang nanglalandi kuno sa boyfriend niya. ‘Yun ang totoo!” madiing chika ng aming impormante.

Ang ganda-ganda naman ng young actress, binibigyan naman siya ng magagandang proyekto ng kanilang istasyon, ano pa ba ang kailangang gawin ng young actor para matahimik ang kalooban niya?

“Actually, napakapasensiyoso nga ng lalaking ‘yun, e! Paulit-ulit na lang na ganu’n ang ugali ng girlfriend niya. Pinagbibigyan lang niya, pero sumosobra na!

“Ang akala kasi ng girl, e, hindi siya kayang hiwalayan ng boyfriend niya, pero ano ang nangyari? Ang guy ang nakipag-break sa kanya. Kuliling-kulili na kasi ang tenga nu’ng guy sa kaseselos at kadududa niya!

“Maraming nanghihinayang sa relasyon nila, matagal na kasi silang mag-boyfriend, pero hindi lang sila umaamin. Pero marami na ring masaya para sa guy, nakatakas na nga naman siya sa sumpa!

“Palagi kasing nagseselos ang girlfriend niya, lahat na lang ng kasamahan nilang artistang babae sa istasyon, pinagdududahan niya! Lalo na ‘yung young singer-actress na ka-network nila, juice colored, galit na galit sa kanya ang girl!

“Ayun tuloy, umali, este, umalis na sa piling niya ang guy. Sino ngayon ang nganga sa break-up nila?” pagtatapos na chika ng aming source.

Bigay na bigay na ang mga bumibida sa kuwento, Bradly Guevarra at Tita Nene Ulanday, baka naman maupo pa kayo ngayon sa Row 4 na katabi ang mabahong basurahan?