Blind item: Aktres di nakayanan ang problema, nag-resign sa serye

MARAMING nakikisimpatya sa isang babaeng personalidad na kinailangang magpaalam agad sa isang proyekto sa telebisyon kahit na hindi pa tapos ang istorya nito.

Mahalaga ang papel na ginagampanan sa kuwento ng magaling na female personality, talagang makaaapekto sa daloy ng istorya ang biglaan niyang pagpapaalam, pero pumayag ang produksiyon dahil sa kanyang pinagdadaanan ngayon.

Matindi ang kuwentong bumabagabag ngayon sa magaling na aktres, hindi ‘yun problemang basta na lang sumulpot na puwedeng tagpain agad-agad, huli na ang lahat para niya maresolbahan.

Kuwento ng aming source, “Palagi kasi siyang malungkot, nakatingin lang sa kawalan, nakaaarte pa rin naman siya pero alam mong may bumabagabag sa kanya.

“Nagpaalam na siya sa programa, meron lang siyang ginawang ilang eksena para magamit sa kuwento kung bakit mawawala na siya sa ikot ng istorya. ‘Yun lang at nagpaalam na siya sa production na agad-agad namang naintindihan ang sitwasyon niya,” simulang kuwento ng aming impormante.

May mga personalidad na mahusay magpanggap. Nakaaarte sila kahit pa may problemang palaging sumisiksik sa kanilang puso at utak habang nasa linya sila ng pagtatrabaho.

“Pero iba itong kay ____ (pangalan ng magaling na aktres), matindi ito, talagang hindi madaling kalimutan ang problemang biglang dumating sa kanilang pamilya.

“Walang may gusto nu’n, hindi nila hinanap, pero nangyari. Kaya gaano man siya kagaling na aktres, e, hindi niya kakayaning itago ang sitwasyon niya. Pahinga ang kailangan niya,” kuwento uli ng aming source.