Foton, Shopinas agawan sa huling semifinals spot

Mga Laro Ngayon
(Cuneta Astrodome)
4:15 p.m. Cignal vs Mane ‘N Tail
6:15 p.m. Foton vs Shopinas
Team Standings: Petron (10-0); Shopinas (5-4); Foton (5-4); Philips Gold (5-5); Mane ‘N Tail (2-7); Cignal (1-8)

PAGLALABANAN ng Foton at Shopinas ang ikalawang puwesto na didiretso sa semifinals sa pagtatapos ngayon ng 2015 Philippine SuperLiga (PSL) classification round sa Cuneta Astrodome sa Pasay City.

Ikalawang laro ito na magsisimula matapos ang pagtatapat ng Cignal at Mane ‘N Tail sa ganap na alas-4:15 ng hapon.

Ang Cignal at Mane ‘N Tail ay maglalaro sa knockout quarterfinals sa Sabado sa Quezon Convention Center sa Lucena City pero nais ng Lady Stallions na angkinin ang ikalimang puwesto upang makuha ang karapatan na labanan ang magiging number four team matapos ang yugtong ito.

Parehong may 5-4 baraha ang Foton at Shopinas kaya’t ang mananalo ang makakasama ng Petron sa semis sa ligang inorganisa ng SportsCore katuwang ang Asics, Mikasa, Senoh, Mueller Sports Medicine, Via Mare, LGR at Healthyway Medical.