Austria winakasan ang paghihintay

MATAPOS ang ilang taong paghihintay, nakuha na rin ni San Miguel Beer coach Leo Austria ang hinahangad na korona sa Philippine Basketball Association (PBA).

Miyerkules ng gabi, ginabayan ni Austria ang Beermen sa 80-78 panalo kontra Alaska Aces sa Game 7 para ihatid ang San Miguel Beer sa kampeonato ng 2014-15 PBA Philippine Cup.

“For me, this is unbelievable,” sabi ni Austria na napanalunan ang kanyang kauna-unahang titulo sa PBA bilang head coach.

“I would like to congratulate the entire Alaska team. I knew from the start that it’s very hard to beat Alaska. Kung may matigas ang ulo, sila ang may pinakamatigas na ulo, but I want to congratulate coach Alex Compton for a job well done,” dagdag pa ni Austria na tinulungan din ang San Miguel Beer na wakasan ang 14-taon tagtuyot sa titulo ng all-Filipino conference.

Bagamat nabura ang itinayong 23-puntos na bentahe sa laro ng San Miguel Beer at nalamangan ng Aces ng anim na puntos sa huling yugto, nagawang makabawi ng Beermen para maitakas ang panalo at mauwi ang korona.

“We were able to recover from their big rallies. ‘Yung character ng players, they did not give up,” sabi ni Austria. “Last two minutes, down kami by six tapos naka-all kami at nakalamang. In the last possession, we bungled that opportunity, but unfortunately for them, they were not able to make it. Our defense just worked in the end.”

At ang kinagandahan nito ay bumida si Arwind Santos sa krusyal na bahagi ng laban para iligtas ang San Miguel Beer.

“Arwind (Santos) did a great job in this series. He played really hard, June Mar (Fajardo) and Arwind,” ani Austria na inaming sumugal siya sa laro nang ibabad ng husto ang dalawa niyang star players.

“In our team, sabi ko itodo ko na si June Mar at Arwind because in the past, ginagawa nila at kaya naman nila. This is a championship game and I don’t want to have a mismatch,” sabi pa ni Austria.