Robin, Mariel pinalitan na si Willie sa Talentadong Pinoy

Kahapon ginanap ang pictorial nina Robin Padilla at Mariel Rodriguez bilang hosts sa pagbabalik ng Talentadong Pinoy sa TV5. Sa Agosto 7 ang first taping day nila.

Kung hindi kami nagkakamali ay sa susunod na buwan ang airing ng TP. Tinawagan namin ang misis ni Binoe para hingan ng karagdagang detalye tungkol sa bago nilang proyekto.

“Oo, may pictorial na kami at sa August 7 (Huwebes) na ang first taping namin, actually hindi ko pa alam kung ano, basta sabi may taping na,” bungad sa amin.

Ipinagdiinan ni Mariel na wala siyang alam na isinama siya ni Robin sa Talentadong Pinoy dahil ang pagkakaalam niya ay ang asawa lang ang kausap ni Manny V. Pangilinan, chairman ng TV5, “I have no idea, Reggs, kasi all I know, it was Robin lang, e, hindi ko naman alam na kasama ako, so parang husband and wife ang concept na wala pa raw ganu’n sa TV kaya TV5 ang magsisimula ng ganu’n.

“So, thankful ako kasi balik-TV na ako, siyempre mayroon na naman akong kabuhayan showcase. Ha-hahaha! So I can buy naman a little for myself,” tuluy-tuloy na sabi ng TV host.

( Photo credit to robin padilla official fanpage )