Ate Vi: Kung hindi ako tatakbo sa 2016, gusto kong magdirek!

VILMA SANTOS INQUIRER

Sa tsikahan namin kay Batangas Gov. Vilma Santos sa nakaraang 2013 Ala Eh Festival ay tinanong namin kung ano ang masasabi niya na nali-link ngayon ang panganay niyang si Luis Manzano kay KC Concepcion at may tsika pang nauunsiyame lang daw ang plano ng TV host-actor dahil natataon na parati silang may sabit, as in laging may dyowa.

Tumatawang sabi ni Ate Vi, “Nauuna pa kayo? Wala, basta, binata ang anak ko.”

Dagdag pa nito, “Hayaan na muna natin. Ba’t ako makikialam diyan. Hihintayin ko na lang siyang pumunta sa akin at magsabi.”

Samantala, natanong din kung nakikita na ba ng Star for All Seasons na susunod sa yapak niya ang panganay na anak sa pulitika? “Si Lucky, hindi ko alam itong 2016. Pero someday I think, baka nandoon din siya, eh.

“Kasi nagda-dive siya sa Mabini (Batangas), every other week or minsan, every weekend, concerned siya sa marine life, sabi niya, ‘Mom, ha, lumalabo na ‘yung tubig do’n, ha! Mom, asikasuhin mo ‘yung ganito. Mom kumuha ka ng chambers sa mga divers.’ ‘Yung may concern na ganu’n.

“So, kung paplanuhin niya ‘yan, okay lang. Walang masama. Pero kamukha ko, dapat maghanda siya. Hindi basta-basta,” katwiran ni Ate Vi.

Hindi pa alam ni Ate Vi kung ano ang plano niya pagkatapos ng term niya bilang gobernadora ng Batangas dahil hindi raw ito pinaplano. Pero may sigurado siyang gustung-gusto niyang gawin, “Alam mo, ang talagang gusto ko, gusto kong magdirek ng pelikula.

“Looking forward ako do’n. Given the chance sa darating na eleksyon at hindi ako tatakbo, I will make sure that I will do one movie as a director.

“Basta ang dream (project) ko lang, ‘yung parang nangyari lang sa loob ng 24 oras. ‘Yung gusto ko ‘yung bida, magandang-maganda sa umpisa, hanggang papangit nang papangit, padumi nang padumi hanggang ending,” kuwento ni Ate Vi.