One Cebu suportado ang pagtakbo ni Camille Villar sa senado sa 2025 Elections

One Cebu suportado si Camille Villar

OPISYAL nang inendorso ng makapangyarihang partido lokal na One Cebu, sa pangunguna ni Governor Gwendolyn Garcia, ang kandidatura ni Las Piñas Rep. Camille Villar sa pagka-senador para sa darating na 2025 midterm elections.

Bilang pagpapakita ng buong suporta, itinaas ni Gov. Garcia ang kamay ni Villar nitong nakaraang Miyerkules, kasabay ng mainit na pagtanggap mula sa 31 alkalde ng lalawigan na pawang miyembro ng One Cebu—ang dominanteng partido sa pulitika ng probinsya.

“Lubos po akong nagpapasalamat at ako’y taus-pusong nagpapakumbaba sa suporta nina Gov. Gwen Garcia at ng mga alkalde na buong pusong sumalubong sa amin,” pahayag ni Villar. Ipinangako rin niya na tututukan niya ang paglikha ng trabaho, pagpapaigting ng kababaihan, pagpapalaganap ng financial literacy, at pagbibigay suporta sa mga maliliit at katamtamang-laking negosyo (MSMEs) sa probinsya.

Baka Bet Mo: Camille Villar: Mahalaga ang papel ng kababaihan sa pagpapatibay ng PH economy

Kasama ang kaniyang kapatid na si Senador Mark Villar, bumisita si Camille Villar sa lalawigan ng Cebu bilang bahagi ng kaniyang kampanya sa rehiyon ng Gitnang Visayas (Region 7).

Batay sa tala ng lokal na Commission on Elections (COMELEC), ang Region 7 ay may kabuuang 4,753,563 rehistradong botante na maaaring bumoto sa darating na Pambansa at Lokal na Halalan. Pangunahing bahagi nito ang Cebu, na may 3,702,363 rehistradong botante at 9,443 clustered precincts.

Ang suporta ng One Cebu ay inaasahang magbibigay ng malaking tulong sa kampanya ni Villar sa rehiyon, at magpapalakas sa kaniyang tsansa bilang isa sa mga matibay na kandidato sa pambansang halalan.