Lola Amour sa campaign jingles gamit ang ‘Raining in Manila’: ‘Walang consent’

PHOTO: Instagram/@billboardphofficial

BILANG campaign period, kaliwa’t-kanang jingle ang naririnig natin kung saan man tayo magpunta.

Ito kasi ang isa sa mga paraan ng mga tumatakbo sa eleksyon upang maging kaaya-aya ang panghihikayat nila sa mga botante, pati na rin upang madali silang matandaan.

Pero kung papansinin ninyo, kung ano ang sikat na kanta ay ‘yun din ang ginagamit na tono sa maraming campaign jingles kung kaya’t halos pare-pareho ang tunog nila.

At ganyan na nga ang nangyari sa isang netizen na kung saan ay ibinandera pa niya sa social media ang pagkaumay niya sa kantang “Raining in Manila” ng bandang Lola Amour dahil ito ang lagi niyang naririnig na campaign jingles sa kanilang lugar.

“Nasusuya na tuloy ako sa ‘Raining in Manila’ dahil sa langyang campaign jingle dito. [Ayoko na] (crying face emojis),” wika ng X user.

Baka Bet Mo: ‘Pepe Mo, Pepe Ko’ jingle hindi na ginamit ng isang kandidato matapos warningan ng Comelec: ‘I’m awfully sorry’

Mukhang naging agaw-pansin ito sa banda kaya inilahad din nila ang kanilang reaction.

“Btw guys, this happened before and I guess it’s happening again,” wika ng banda.

Paglilinaw nila, “All of the campaign jingles using our songs do not have our consent.”

“Vote wisely [laughing emoji],” anila sa post.

Btw guys, this happened before and I guess it’s happening again: All of the campaign jingles using our songs do not have our consent. Vote wisely 🤣 https://t.co/2kEorljA8g

— LOLA AMOUR 🏖️ (@lolaamourmusic) March 29, 2025

Sa comment section, maraming fans ang nagsabing dapat kasuhan ang mga gumagamit ng kanilang kanta na walang paalam.

Narito ang ilan sa mga nabasa namin:

“Hindi ba sila pwede kasuhan mga lods?”

“Pag nagnanakaw ng kanta for sure magnanakaw din yan sa kaban ng bayan”

“Pakikasuhan po sila please thank you!”

“Pwede mo nyo po sila kasuhan ng masampolan. May nagkaso na nga kay Quiboloy haha”

“You should sue them, then expose these politicians for the crooks that they are for stealing your intellectual property.”

Para sa kaalaman ng marami, labag sa batas ang panggagaya o paggamit ng mga kanta nang walang pahintulot o walang maayos na credits.

Ayon sa Intellectual Property Code of the Philippines (RA 8293), ang sinumang mapatunayang nagnakaw ng kanta ay maaaring makulong ng dalawa hanggang limang taon at pagmultahin ng P50,000 hanggang P200,000.

Samantala, ang midterm elections o botohan ay nakatakda na sa darating na May 12.

Ang campaign period para sa senatorial at party-list bets ay nag-umpisa na nitong Enero, habang ang para sa local candidates ay nitong Biyernes, March 28.