BABAE AKO: LTO may libreng ‘Theoretical Driving Course’ para sa mga kababaihan
INQUIRER file photo
PARA sa mga kababaihan diyan, nais mo bang matutong mag-drive?
May magandang balita ang Land Transportation Office (LTO) para sa inyo!
Sa pagdiriwang ng National Women’s Month, ang LTO ay may libreng Theoretical Driving Course (TDC) para sa mga kababaihan sa buong bansa ngayong Marso.
Isa ito sa mga programa sa ilalim ng “Serbisyo Para kay Juana” ng Philippine Commission on Women (PCW) bilang bahagi ng Women’s Month celebration.
Baka Bet Mo: BABAE IBANDERA: Mensahe ng Ilang artista sa pagdiriwang ng National Women’s Month
“Bilang pagkilala sa lakas, tibay, at mga kontribusyon ng mga kababaihan sa lahat ng sektor, ang Land Transportation Office (LTO) ay magsasagawa ng FREE Theoretical Driving Course (TDC) 𝐏𝐀𝐑𝐀 𝐒𝐀 𝐌𝐆𝐀 𝐁𝐀𝐁𝐀𝐄 na aplikante ngayong pagdiriwang ng 𝟐𝟎𝟐𝟓 𝐍𝐚𝐭𝐢𝐨𝐧𝐚𝐥 𝐖𝐨𝐦𝐞𝐧’𝐬 𝐌𝐨𝐧𝐭𝐡,” saad sa Facebook post ng ahensya.
Paalala pa, “Ang bawat batch ng nasabing kurso ay makatatanggap lamang ng singkwentang (50) aplikante.”
Ang 15-hour program ay isa sa mga requirement upang makakuha ng Student Permit bago ang non-professional driver’s license.
Sa kursong ito, matututunan ang mga sumusunod:
Organisasyon at operasyon ng LTO
Mga kinakailangan at proseso sa pagkuha ng lisensya
Mga batas-trapiko at regulasyon
Defensive driving at disiplina sa kalsada
Tamang kasanayan sa pagmamaneho
Paano mag-park, umiwas sa disgrasya, at humarap sa basic car problems
Para makasali sa libreng driving course, magsasagawa ang LTO Central Office ng libreng seminar mula Marsch 11 hanggang 14.
Ngunit kung hindi ka makakakuha ng slot, marami ring regional LTO offices ang mag-aalok nito sa buong buwan.
Ang iba pang requirements ay dapat babae at may edad 16 pataas, magdala ng mga PSA Birth Certificate, National ID (kung mayroon), Marriage Certificate (para sa mga may asawa), Notarized Parent Consent (para sa menor de edad) at photocopy ng Guardian’s ID na may 3 pirma, at original Certificate of Indigency mula sa Barangay.
Ilan pa sa mga dapat tandaan ay kailangang personal na dumalo sa seminar, magsuot ng angkop na kasuotan (bawal ang sleeveless, tsinelas, at shorts), at magdala ng ballpen at snacks.
Bago sumali, gumawa rin ng account sa portal@lto.gov.ph.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.