Fyang Smith PBB Gen 11 Big Winner, wagi ng house & lot, P1-M

Fyang Smith

ITINANGHAL na Big Winner si Fyang Smith sa katatapos lamang na “Pinoy Big Brother Gen 11” ng ABS-CBN.

Matapos manirahan ng 14 weeks sa Bahay ni Kuya, pinaboran ng madlang pipol si Fyang dahil siya nga ang nakakuha ng pinakamataas na boto sa naganap na Big Night.

Waging-wagi ang “Anakabogerang Influencer ng Mandaluyong City” sa makasaysayang Big Night ng “PBB  Gen 11” kagabi na nagtala ng mahigit 2.26 milyong live online views sa YouTube at Facebook ng ABS-CBN Entertainment.

Nakakuha si Fyang ng pinakamataas na public votes with 30.66% para maging ika-18 na Big Winner ng sikat na reality show.

Baka Bet Mo: Lolit Solis napa-throwback nang mabalitaan ang isyu ni Will Smith: Ganoon rin ang nangyari kay Rudy Fernandez

Mag-uuwi siya ng bagong house and lot mula sa Vista Land and Lifescapes Inc. at P1 milyong cash.

Lubos ang pasasalamat ni Fyang sa mga sumuporta sa kanya. Aniya, “I can’t believe this! I want to thank every one of you, who has supported me since day one. I did it!”

Gumawa ng kasaysayan ang “PBB Gen 11” sa pagtala nito ng pinakamataas ng live online views noong Big Night kung saan tinutukan ng mga manonood kung sino ang hihiranging Big Winner.

Second Big Placer naman si Rain na nakakuha ng 26.05% ng mga boto at mag-uuwi ng P500,000, habang Third Big Placer naman si Kolette na may 25.91% ng mga boto at P300,000 cash prize.

Fourth Big Placer naman si Kai na nakakuha ng 17.38% ng mga boto at mag-uuwi ng P200,000.

Nanalo rin ang Big Four ng round trip package to Korea.