Lorna Tolentino
WALA pang karanasan ang Grand Slam Queen na si Lorna Tolentino nang maging karelasyon niya ang yumaong action star na si Rudy Fernandez.
Yan ang inamin ng award-winning veteran actress nang mapag-usapan ang naging takbo ng pagsasama nila bilang mag-asawa ni Daboy noong nabubuhay pa ito.
Inalala ni LT ang kanyang kabataan at ang nakaraan nila ni Rudy sa interview ni Korina Sanchez na mapapanood sa Net25 YouTube channel.
Tanong ni Korina kay Lorna,, “Ilang taon ka noong may Rudy Fernandez na?”
“Seven years old ako noong nakita niya ako. Tapos noong 14 years old ako, naging best friend niya yung kapatid ng mama ko.
“Pumupunta siya sa bahay tapos nakikita na niya ako. Noong adult na yung mga roles namin, medyo naging close na kami,” pagababahagi ng aktres na napapanood ngayon sa “FPJ’s Batang Quiapo”.
Ang pangako raw sa kanya noon ni Daboy nang una silang magkita ay pakasalan siya kapag dumating na ang tamang panahon. Sa pagkakaalala niya, 17 lamang ang aktor at 7 years old naman siya.
“Actually, ang sinabi niya sa akin, tinupad daw niya yung pangako niya noong pinakasalan niya ako. Yung pangakong pakakasalan niya nga ako noong makita niya ako noong seven years old ako.
“Palakihin daw nang mabuti yung batang yan at pakakasalan ko siya,” ang kuwento pa ng aktres.
Kasunod nito, inamin nga ni LT kay Korina na wala pa siyang kahit anong karanasan noon sa pag-ibig nang maging boyfriend niya si Rudy.
“Wala akong experience kundi si Daboy lang. Mas okay para sa akin kasi pareho kami ng industriya. Maraming tinuro sa akin si Daboy na dala-dala ko hanggang ngayon,” pahayag ni Lorna.
Kasunod nito, nabanggit din ng premyadong aktres na hindi rin “perfect” ang naging buhay niya noon at marami rin siyang pinagdaanang pagsubok na mas nagpatatag at nagpatapang sa kanya.
“I’m thankful for God’s many blessings. My life isn’t perfect. Hindi ako perfect gaya ng madaming tao.
“May nagtatago ding monster sa loob ko. May mga monsters tayong kinakaharap sa buhay natin, mga challenges na kailangan nating malagpasan.
“At sa dami ng pinagdaanan ko sa buhay, grateful naman ako na nasa tamang path ako.
“Nasa sa atin na lang kung paano natin iha-handle ang mga monsters ng buhay natin,” aniya pa.
Dalawang beses ikinasal sina Lorna at Rudy – sa isang civil ceremony noong 1983 at sa isang bonggang-bonggang church wedding noong 1992.
Biniyayaan sila ng dalawang anak – sina Renz and Raphael. Nagkaroon din si Daboy ng anak sa aktres na si Alma Moreno, at yan nga ay si Mark Anthony Fernandez.
Sumakabilang-buhay naman ang action star noong June, 2008 dahil sa sakit na cancer.
Sylvia, Lorna, Ria sanib-pwersa sa Japanese drama na ‘Monster’: ‘Talaga namang nakakadurog ng puso!’