Rochelle Pangilinan
NANINIWALA ang Kapuso actress-dancer na si Rochelle Pangilinan na malaki ang naitulong sa kanyang pagiging aktres ang talento niya sa pagsasayaw.
Ayon sa dating leader ng grupong SexBomb Girls, madali siyang nakapag-adjust sa larangan ng pag-arte dahil na rin sa husay niya sa paghataw sa dance floor.
“Sa totoo lang ‘yung pagsasayaw malaking tulong sa pag-arte,” ang pagbabahagi ng Kapuso star sa panayam ng “Updated with Nelson Canlas” podcast.
Paglilinaw ng celebrity mom, “Nakatulong siya, ‘yung pagsasayaw. Kasi ‘yung timing, lahat, same rin siya ng pag-arte. Sa pag-arte may role kang kailangang gampanan.
“Ganu’n din naman sa pagsasayaw, puwede kang maging sad, kung sad ang gusto mo, puwede kang sumayaw ng contemporary.
“Kung masaya ka naman, masayahin ang role mo, puwede ka namang mag hip-hop,” ang paglalarawan pa ni Rochelle sa pagiging dancer at aktres.
Patuloy pa niya, “Medyo pareho siya. Malaking tulong sa akin ‘yung pagsasayaw hanggang sa makarating ako sa pagiging artista
“‘Yung timing and kung paano mag-deliver ng lines, big help siya. Hindi ako masyadong nahirapan (sa pag-a-adjust),” katwiran pa niya.
In fairness naman kasi talaga kay Rochelle, kinarir naman talaga niya ang pagiging artista mula nang mawala sa eksena ang SexBomb Dancers at nahasa rin siya nang bonggang-bongga sa sariling drama anthology ng kanilang grupo na “Daisy Siete” na umere mula 2003 hanggang 2010.
Baka Bet Mo: Rochelle Pangilinan nanindigan sa kanyang kandidato: Isa rin siyang ina gaya ko
Kasunod nito, binigyan din siya ng GMA ng pagkakataon na maging versatile actress sa pamamagitan ng iba’t ibang klase ng serye, kabilang ang Darna (2005 at 2009), Amaya (2011), at Encantadia (2016).
Napapanood siya ngayon gabi-gabi sa Kapuso series na “Mga Lihim ni Urduja” na pinagbibidahan nina Kylie Padilla, Gabbi Garcia at Sanya Lopez.
Feeling blessed and flattered naman si Rochelle nang banggitin sa kanya ni Nelson na isa na siya sa mga Kapuso stars na maituturing na talagang aktres.
Natigilan sandali si Rochelle sabay sabing, “Sorry beh ha, kinikilig ako noong sinabi mong ‘Aktres ka.’ Wow, thank you!”
Agree naman kami diyan dahil ilang beses na ring napatunayan ni Rochelle ang husay niya sa pagganap sa iba’t ibang mapaghamong karakter.
Totoo nga bang si Rochelle Pangilinan ang dahilan kung bakit nabuwag ang SexBomb Dancers?