HANGGANG ngayon ay mainit pa ring usapin ang nangyari sa pagitan nina Willie Revillame at ng kanyang nanay-nanayan na si Cristy Fermin.
Matatandaang kamakailan ay nag-trending ang dalawa dahil sa sagutan patungkol sa diumano’y panunumbat ni Willie sa mga taong kanyang natulungan.
Kaya naman sa episode kahapon ng “Cristy Ferminute” ay natalakay muli nila ito pati na rin ang iba pang personalidad na pinaringgan raw ni Willie na sina Ogie Diaz at Gab Valenciano.
Aniya, labis raw siyang nasaktan sa mga sinabi ni Willie sa kanyang programang “Wowowin” at hindi raw basta basta mawawala.
“Pambansang kahihiyan po ang aming inabot nina Ogie Diaz at Gab Valenciano, yun po ay hindi mahihilot. Yun po ay hindi pupwedeng daanin lang basta sa ganito na lang. Masakit pong masyado. Kaya para matigil na, ibalik sa kanya ang kung ano mang isinusumbat niya,” pagbabahagi ni ‘Nay Cristy.
Dagdag pa niya, “At Willie, si Ogie Diaz ay ibang klaseng tao na, kung nilalait-lait mo siya ngayon, kung noon ay wala kang respeto sa kanya, tumigil ka. Yang bibig mo, itikom mo. Milyonaryo na si Ogie Diaz, pero hindi niya ipinagiingay, hindi niya ipinagsasasabi ang mga tulong na naibibigay niya sa maraming foundation.”
Giit pa ni ‘Nay Cristy, ang pagtulong raw ng talent manager ay hindi na niya pinapangalandakan sa iba.
“Hindi siya nagpupunta sa isang lugar, may dalang camera, na andun ka pa lang at nagbibigay ng ano eh sinasabihan ka na ng, ‘I-edit niyo na yan! I-edit niyo na agad-agad yan! Bukas ipapalabas na yan!’
“Hindi ganun si Ogie. Tahimik lamang siyang tumutulong. Ang kanyang pagtulong ay mula sa puso, hindi mula sa nguso,” lahad ni Cristy.
Mukhang matagal-tagal ang isyung ito lalo na’t inamin niyang talagang nasaktan siya sa ginawa ni Willie.
Bagama’t nagkausap na sila at humingi na ng tawad ang “Wowowin” host ay sinabi ni ‘Nay Cristy na kaya niyang magpatawad ngunit hindi siya nakalilimot.
Ogie Diaz ‘binanatan’ si Willie Revillame: Sana na-happy siya sa kanyang panunumbat