Aktres hindi type ang leading man sa ginawang pelikula; magkaibang level ang utak

INAMIN ng baguhang aktres na hindi niya type ang leading man niya sa ginawang pelikula dahil hindi raw sila pareho ng level ng utak.

Yes, ito ang inamin ng aktres sa common friend namin dahil nang magkaroon ng tsansa na magkakuwentuhan sila ay kinailangan daw niyang ipaliwanag pang mabuti kung ano ‘yung ibig niyang sabihin.

Sabi ng aktres, “Magkaiba ang hilig namin kasi kaya hindi kami same wave length? Baka kapag inaral ko yung hilig niya at inaral naman niya ‘yung mga gusto ko, posibleng magkaintindihan kami.”

Dalawang beses lang daw nagkatsikahan ang aktres at leading man niya at pagkatapos noon ay mas ginusto pa nitong matulog na lang pagkatapos ng shooting nila.

Ang leading man naman ay nagkulong na rin sa kuwarto niya at naririnig na naglalaro ng Mobile Legend.

Naikuwento rin ng aktres sa kaibigan namin na type niyang kausap ang isa pang aktor dahil wala siyang ginawa kundi tumawa nang tumawa sa mga biro nito.

Sabi pa ng aktres, napakasarap daw  kausap ng nasabing aktor dahil kahit anong isyu raw o topic ay alam nito kaya nagkakaintindihan.

“Type lang kausap, hindi naman sinabing type niya as in dyowa,” sabi ng kaibigan namin.

Anyway, ang leading man ng aktres ay madali namang kausap pagdating sa pera dahil mabilis siyang maglabas kapag may nangangailangan.