2 ‘halimaw’ sa The Clash season 3 kinatatakutan; ‘Kakulay Kalaban’ round mas intense
KUNG may dalawang “halimaw” na contestants sa “The Clash Season 3” ang kinatatakutang makalaban ng mga Clashers, yan ay walang iba kundi sina Jennie Gabriel at Jessica Villarubin.
Yan ang inamin ng ilang pumasok sa susunod na laban na matapos magtagumpay sa kanilang winning performance para sa “Kakulay Kalaban” round.
Iba rin naman kasi talaga ang pagiging intense performers ng dalawa kapag nasa stage na, as in kung mahina kang kalaban talagang lalamumin ka nila nang buhay.
Sa isang virtual interview, sinagot ng Clashers mula white group na sina Audrey Mortilla at Yuri Javier ang tanong kung sino sa mga contenders ang ayaw nilang makatapat sa competition.
Sagot ni Audrey, ang impersonator ni Angel Locsin na si Jennie Gabriel, “Lahat magaling pero ‘yung feeling ko pinakamalakas si Ate Jennie. Siya ‘yung pinaka-anxious ako maging kalaban.”
Si Jennie rin ang binanggit ni Yuri pero idinagdag niya ang pangalan ni Jessica Villarubin na nakatanggap pa ng standing ovation mula sa Clash Panel na si Ai Ai delas Alas.
Ani Yuri, “Nu’ng nakalaban ko si Ate Jennie, lumawag din ‘yung loob ko kasi parang naisip ko na kaya din pala natin ‘to. Kung sino ‘yung nasa grupo ko, ‘yun talaga ‘yung sobrang anxious ako makalaban.
“Pero sabi ko, we’ll just do our best kasi alam ko na walang mag-gi-give up sa ‘ming lahat,” paliwanag niya.
Reaksyon naman ni Jennie, wala naman dapat ikatakot ang kanyang kapwa Clashers, “Lahat naman po kami magagaling, may kanya-kanya kaming style sa pagkanta.”
Samantala, itutuloy tonight ang “Kakulay Kalaban” round para sa Red Group na kinabibilangan nina Kenan Quitco from Quezon City, Larnie Cayabyab from Dasmarinas Cavite, Princess Vire from Quezon City, Rose Velasquez from Pampanga and Renz Robosa from Pangasinan.
Sino kaya ang papasa sa panlasa ng Clash Panel na sina Ai Ai delas Alas, Christian Bautista at guest judge Pops Fernandez? Kaya yan ang tutukan sa pagpapatuloy ng laban sa “The Clash Season 3” hosted by Julie Anne San Jose and Rayver Cruz with Ken Chan and Rita Daniel as Journey hosts.
Napapanood pa rin ang “The Clash” tuwing Sabado after “Pepito Manaloto” at Linggo pagkatapos ng Daig Kayo Ng Lola Ko sa GMA 7.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.