Robi Domingo, iniisip na ang pagpapakasal sa non-showbiz GF

https://www.youtube.com/watch?v=Tpp6OCQBflk&feature=emb_logo

Para sa television host na si Robi Domingo, ang non-showbiz girlfriend na si Maiqui Pineda na ang gusto niyang makasama habang buhay.

Kasalan na ba ang ibig sabihin nito?

“I feel it. Eto na talaga ‘yon,” ang pahayag ni Robi sa programang “Magandang Buhay” nitong Biyernes. “Nowhere to go but up, but there.”

Ipinaliwanag ni Robi na kasama na ang biological component sa konsiderasyon na lumagay na sa tahimik.

“Siyempre ang mga babae at the age of ganyan, may pressure din sa kanila. So I take that into consideration,” wika niya.

Punung-puno ng pagmamahal na inilarawan ni Robi ang kanyang nobya: “Parang Mama Mary lang look nya. Napaka-graceful and yet full of substance.”

Ikinuwento ni Robi sa programa kung paanong ang simpleng pagasasama nila sa isang Christmas party ay nauwi sa isang diving scene sa Anilao, Batangas kung saan ipinahayag niya ang saloobin para sa dalaga habang nasa ilalim ng dagat.

At nakamit niya ang isang matamis (sure ka, hindi maalat?) na oo.

Agosto 6, 2018. Hindi ito malilimutan ni Robi.

Gano nga ba ka-in love si Robi kay Maiqui na actually ay isa n’yang batchmate sa Ateneo de Manila University: “Boses pa lang n’ya, music to my ears na.”

Pero may mga kondisyong itinakda ang magkasintahan bago sila tuluyang magpalitan ng “I do.”

Para kay Robi, may status ng kanyang career na gusto muna niyang maabot habang si Maiqui naman ay gusto munang magkaroon ng posisyon sa kanyang trabaho.

“Kung mangyari man ‘yon eh ‘di panahon na para lumuhod,” wika pa ni Robi.

At bago matapos ang segment, sinabi ni Robi sa mga host ng programa na sina Karla Estrada, Melai Cantiveros, at Jolina Magdangal na, “Pwede ko ba kayong tawaging ninang?”

Samantala, dahil nagdiwang ng kanyang ika-31 kaarawan nitong Setyembre 27, may inihandang pagbati ang programa mula kay Maiqui.

“Thank you for always making me feel so special even at a time like this when we don’t get to see each other often I still feel all the love,” ani  Maiqui sa kanyang recorded message.

“I also wanna tell you how proud I am of you for all that you’ve done and achieved so far. But I’m also very excited to see what else is in store for you and your career in life. You know that I’m here supporting you always. Happy Birthday.”