P1B kita nawawala dahil sa kakulangan ng masasakyan
TINATAYANG P1 bilyong kita ang nawala sa mga tsuper ng jeepney, konduktor, at mga empleyado na hindi nakakapasok dahil sa kakulangan ng masasakyan.
Ayon kay Marikina Rep. Stella Quimbo nasa 81,920 ang mga pampasaherong jeepney at bus at UV Express ang hindi nakakabiyahe dahil sa ipinatutupad na community quarantine.
“Balik trabaho na sana ang mga manggagawa pero paano kung wala naman public transport? Ang ending ay tila naka-lockdown pa rin (sila),” ani Quimbo sa pagdinig ng House committee on Metro Manila Development.
Tinatayang 2.03 milyong manggagawa umano ang walang sariling sasakyan kaya maaaring hindi nakakapasok ang mga ito sa trabaho.
“NCR (National Capital Region) loses 1 billion pesos per day income. Heto ang nawawalang kita ng mga tsuper at mga manggagawa na hindi nakakapasok sa trabaho,” saad ng lady solon.
Nanawagan si Quimbo na ayusin ang hanay ng transportasyon upang mapunan ang kakulangan ng masasakyan.
Kung magtatagal ang ganitong sitwasyon sinabi ni Quimbo na mas mahihirapang bumangon ang ekonomiya dahil hindi sisigla ang merkado kung walang pambili ang mga tao.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.