Korina sa trolls: Bayad ang mga lintik na ‘yan, kalahati ng katawan nila nakasanla kay Satanas 

KORINA SANCHEZ

HINDI na napigilan ng award-winning broadcast journalist na si Korina Sanchez ang kanyang galit sa mga bayarang trolls sa social media.

Umabot na ang TV host sa pagsasabing nakasanla na sa demonyo ang katawan ng mga taong walang ginawa kundi ang manira, mam-bully at manglait ng kanilang kapwa sa panamagitan ng socmed.

Naglabas si Korina ng saloobin tungkol sa mga bashers at paid trolls sa naging panayam niya kay Kim last Sunday. 

Isa ang TV host-journalist sa mga nagtanggol sa aktres nu’ng kasagsagan ng pambu-bully sa dalaga dahil sa kanyang “classroom rules” at “bawal lumabas” statement. Ngunit sa halip na ma-depress at magpakalunod sa kalungkutan, bumangon si Kim at ginawang positibo ang lahat ng ibinatong kanegahan sa kanya.

Nagpasamat ang Kapamilya actress kay Korina dahil sa pagtatanggol nito sa kanya. At dito na nga inilabas ng misis ni Mar Roxas ang kinikimkim na galit sa mga bayarang netizens.

“Definitely. Alam mo kung bakit? Aminin na natin na lahat ng mga nega na ‘yan, titingnan mo yung profile, ang followers wala pang limampung tao. Obvious ba, na bayad ang mga lintik na ‘yan!” simulang pahayag ni Korina.

Tila na-shock naman si Kim sa sinabi ng TV host ngunit kita naman sa mukha ng aktres ang pagsang-ayon.

“Ang tingin ko sa mga troll, ang kalahati ng katawan nila ay nakasanla na kay Satanas. Isipin mo, pinalaki sila ng mga nanay at tatay nila para mag-nega.

“Talaga? ‘Yan ba ang ambisyon ng mga magulang para sa mga anak nila?

“Pero naiintindihan ko. Lahat sila nangangailangan ng pagkakakitaan,” tuluy-tuloy na sabi ni Korina. Aniya pa, kumikita raw ang mga bayarang troll ng P500 kada araw.

“Sinasabi ko lang sa lahat ng mga troll, ‘Talaga, ang kabuhayan ninyo ay magpaka-nega?’

“Kahit hindi ninyo pinapaniwalaan basta maka-nega lang kayo, makasira lang kayo ng tao, makapanakit ng damdamin. Yan ang pinagkakakitaan ninyo ng limandaang piso kada araw?

“Sinasabi ko lang sa inyo, hindi pa huli ang lahat. Puwede pa kayong magbago ng buhay ninyo.

“Kasi sa totoo lang, hindi ko talaga pinapaniwalaan na proud ang parents ninyo sa ginagawa ninyo, right?” aniya pa.

“Magalit na sila kung gusto nila, wala akong pakialam. Kaya ko sila, kahit sabay-sabay pa sila!” palaban pang pahayag ni Korina na tulad ni Kim ay binatikos din nang bonggang-bongga dahil sa pagtatanggol niya sa ABS-CBN.