FDA: Wala pang aprubadong rapid test kit para sa COVID-19

WALA pa umanong point-of-care test kit o rapid test kit para sa coronavirus disease 2019, ito ang paalala ng Food and Drug Administration.

Hindi umano totoo na mayroon ng aprubadong COVID-2019 test kit na gaya ng pregnancy test kit na makikita agad ang resulta.

“Ang mga naunang nailabas na listahan ng FDA na aprubadong COVID 19 test kits ay gumagamit ng Real Time Polymerase Chain Reaction (RT-PCR). Ito ay isang proseso na nangangailangan ng PCR Machine sa laboratoryo at mga tauhang may sapat na kaalaman sa paggamit nito,” saad ng FDA.

Ang mga sample na kinukuha sa mga pinaghihinalaang nahawa ng COVID-19 ay ipinadadala sa laboratoryo upang masuri kung positibo ang mga ito.

Ayon sa FDA naglabas din ng pahayag ang Department of Health na nagsasabi na wala pang malinaw na ebidensyang susuporta sa paggamit ng lateral flow rapid (IgG/IgM) test sa pagkumpirma ng COVID 19.

Ayon din sa DOH, tanging ang mga laboratoryo na nasuri ng Research Institute for Tropical Medicine ang maaaring magproseso ng mga RT-PCR based kits.