OOTD ng 3 GMA News Anchors may konek sa ipinaglalaban ng ABS-CBN?

NAGING kontrobersyal ang OOTD ng tatlong news anchors ng GMA 7 na sina Pia Arcangel, Vicky Morales at Atom Araullo sa live broadcast ng 24 Oras nitong Martes, Feb. 11.

Isang netizen ang nakapansin ng kulay ng kanilang mga damit sa nasabing programa na tila kakulay ng ABS-CBN logo. Ipinost niya ito sa Facebook kaya mabilis kumalat sa social media.

Makikita sa nasabing screenshot si Vicki na nakasuot ng green boatneck shift dress habang nakapula at blue naman si Atom. Ang nasabing mga kulay ang makikita sa logo ng rival network ng GMA 7.

Caption ng netizen sa kanyang Facebook post, “Did… did the 24 Oras reporters really wear ABS-CBN’s theme colors??? Is this a coincidence??? Is this media solidarity???” Dagdag pa niya, “My heart is soft.”

Maraming nagkomento na ito marahil ang paraan ng GMA para ipakita ang suporta sa ipinaglalaban ng Kapamilya Network, lalo na ang press freedom sa gitna ng issue ng franchise renewal ng istasyon.

Pero sabi naman ng ilang netizens baka raw nagkataon lang ito at walang ibang sabihin.

Ilang Kapamilya stars naman ang naniniwala na pagpapakita ito ng “solidarity”. Ayon sa international singer na si Lea Salonga at The Voice Teens coach, “Looks like solidarity to me!”

“I’d like to think solidarity,” ang komento rin ng Concert King na si Martin Nievera.

“Mabuhay!” tweet naman ng Umagang Kay Ganda host na si Gretchen Ho.

Pinusuan din ni Agot ang nasabing post habang nag-comment naman si Jim Paredes ng, “Proud of you guys. Mabuhay kayo.”

Samantala, ikinatuwa rin ng mga Kapamilya stars and supporters ang tweet ni Atom bilang suporta sa ABS-CBN. Aniya, “In competition, we bring out the best in each other which hopefully benefits the audience we aim to serve.

“In defending press freedom as one, we are the proverbial rising tide that lifts all boats. Our hearts go out to our colleagues in these challenging times. Laban lang!”