Mga sasakyan inararo ng pick-up: 3 patay, 7 sugatan
TATLO katao ang nasawi at pito pa ang nasugatan nang araruhin ng pick-up ang pitong sasakyan sa Bocaue, Bulacan, Lunes ng tanghali, ayon sa pulisya.
Inaalam pa ang pagkakakilanlan ng mga nasawi at nasugatan, ayon sa ulat ng Bulacan provincial police.
Sa mga sugatan, dalawa ang kritikal ang kondisyon, ayon naman sa Bocaue Municipal Disaster Risk Reduction and Management Office.
Naganap ang insidente sa bahagi ng MacArthur Highway na sakop ng dakong alas-12:30.
Bago ito, minamaneho ng 67-anyos na si Fernando Roxas ang Mitsubishi Strada sa southbound lane, mula Balagtas.
Nabundol ni Roxas ang isang motorsiklo, pero imbes na tulungan ang biktima’y tumakas patungong Marilao sakay pa rin ng pick-up, ayon sa pulisya.
Inokupa ng Strada ang northbound lane at nang makarting sa Brgy. Biñang 1 ay inararo ang dalawang tricycle, isang motorsiklo, at isang Mitsubishi Adventure na pawang mga nakaparada sa road shoulder.
Patuloy na umusad ang Strada hanggang sa masalpok ang kasalubong na Toyota Revo at motorsiklo.
Nasa kostudiya na ng pulisya si Roxas habang hinahandaan ng kaukulang kaso.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.