Cristine gustong ibitin nang patiwarik, sagad ang kasamaan

CRISTINE REYES AT SOPHIA REOLA

Sa Biyernes nang tanghali ay magtatapos na ang seryeng Nang Ngumiti Ang Langit ng ABS-CBN na pinagbibidahan ng magandang child star na si Sophia Reola na mas kilala ng manonood sa pangalang Micmic.

Napakagandang bata, napakahusay pang umarte, mula sa unang sultada ng seryeng ito ay sinubaybayan na si Micmic ng ating mga kababayan.

Pero sa bawat magandang kuwento ay may kontrabida, kung walang kontrabida ay ninipis at pupusyaw ang istorya, du’n pumapasok ang napakasalbaheng role ni Cristine Reyes.

Inipon-ipon na yata ang lahat ng kawalanghiyaan sa papel na ginagampanan ng sexy actress.

Napakasarap niyang pitikin sa ilong, ang dapat sa kanya ay ibitin nang patiwarik sa puno na punumpuno ng mga langgam, ganu’n ang gustong gawin sa kanya ng mga kababayan natin.

Pero mahusay magkontrabida si Cristine, magagalit ka lang sa kanya dahil epektibo ang pagkokontrabida niya, siya ang naging bikig sa lalamunan ni Micmic at ng magaling na aktor na si RK Bagatsing.

Sa darating na Lunes ay magbabago na ang tempo ng aming pananghalian. Kikilatisin muna namin ang ipapalit na serye sa Nang Ngumiti Ang Langit kung masasarapan ba ang aming panlasa para subaybayan din namin na tulad ng seryeng kinarir ni Direk FM Reyes.