Star Cinema, ABS-CBN wala pa ring napipiling bagong Darna?

LIZA SOBERANO

ANO na kaya ang update sa pa-audition ng Star Cinema para sa Darna at sa iba pang karakter na kasali sa pelikula? May napili na kaya silang pwedeng pumalit kay Liza Soberano?

O, baka naman si Liza pa rin ang gaganap sa iconic Pinay superhero at hihintayin na lang ang paggaling ng kanyang inoperahang daliri?

Samantala, may nabanggit sa amin ang isang source na tila may magiging pagbabago sa karakter ni Ding (sidekick ni Darna) na imbes na bata ay gagawing binatilyo na at kailangang bagong mukha.

Kung bagong mukha ang gustong gumanap na Ding, e, di wala nang pag-asa ang Star Magic artists dahil halos lahat sila ay napanood na sa iba’t ibang pelikula at programa ng ABS-CBN.

Kaya tiyak na isa rin sa ipina-audition ng ABS-CBN at Star Cinema ang role ni Ding.

Suntok man sa buwan pero may suhestiyon kami, bakit hindi nila kunin ang anak ni Manila Mayor Isko Moreno na si Joaquin? Hindi kami ang PR ng bagets, pero napansin naming guwapo at may charm siya sa mga batang girls. At higit sa lahat, may fans na agad. Hindi pa man artista ay tinitilian na siya.