Kalat na: Jimmy Bondoc ginawang ‘attack dog’, inutusang kumahol kontra ABS-CBN

JIMMY BONDOC

Maraming naniniwala na hindi ganyan magiging katapang si Jimmy Bondoc kung walang basbas ng malalaking tao sa kanyang paligid. Paniwala ng iba ay may go signal ang pagdaldal ng one-hit-wonder na singer.

Ang tawag sa ganu’n ay attack dog. Nangyayari talaga ang ganu’n, may iniuumang na tao ang mga ayaw lumantad para ‘yun ang kumahol nang kumahol, nakatago lang sila sa likuran.

Pero may mga nagsasabi naman na nu’n pa ay madaldal na talaga ang acoustic singer. Marami na siyang kuda. Ang tanong lang ay kung bakit nagmatapang siyang banggain ang isang higanteng network na tulad ng ABS-CBN.

Sa kasaysayan, halos lahat ng mga personalidad na nagsampa ng kaso laban sa malalaking network ay nabubukulan, sila ang nasaktan at hindi ang pader na binangga nila.

Ngayon ay natikman na sigurong lahat ni Jimmy Bondoc ang mga salitang ni ayaw niyang malasahan sa mundong ibabaw. Nakita niya na rin ang resbak sa kanya ng mga nasasakupan ng network na kinasasabikan niyang makitang sarado na.

Pa-victim pa nga si Jimmy ngayon, nagsusumbong siya sa mga kababayan natin kung paano raw siya wasakin ng mga taga-ABS-CBN, siya itong nagsimula ng sunog pero ngayong naglalagablab na ang apoy ng galit sa kanya ng mga nasasagasaan niya ay siya pa ang sumisigaw para pakinggan siya.