Roderick Paulate sinuspinde ng 90 araw ng Sandiganbayan

SINUSPINDE ng 90 araw ng Sandiganbayan seventh Division si Quezon City Councilor Roderick Paulate kaugnay ng kinakaharap nitong kasong katiwalian kaugnay sa umano’y mga ghost employees ng kanyang opisina na sumahod sa city hall.

Inatasan ng korte ang Department of Interior and Local Government na ipatupad ang preventive suspension order.

“Accused Roderick Mendenilla Paulate is hereby ordered suspended from office and said accused is directed to cease and desist from further performing and/or exercising thee functions, duties, and privilege of his position as Member of the Sangguniang Panlungsod of Quezon City,” saad ng walong pahinang desisyon.

Si Paulate ay nahaharap sa kasong graft at Falsification of Public Documents kasama ang kanyang driver/liaison officer na si Vicente Bajamunde kaugnay ng 30 ghost employees.

Kumita umano ang mga ghost employees na ito ng P1.109 milyon mula Hulyo-Nobyembre 2010. Nadiskubre ito ng Commission on Audit.

Ang personal data sheet ng mga empleyadong kinukuwestyon ay inayos umano ng tanggapan ni Paulate at ipinadala sa Office of the Vice Mayor para sa kanilang suweldo.

Si Bajamunde umano ang kumuha sa sahod ng mga ito gamit ang authorization letters mula kay Paulate.
Ayon sa korte ang suspension ay mandatory sa ilalim ng batas.

“This is a reality that we cannot ignore, hence, the legal presumption that unless the accused is suspended, he may frustrate his prosecution or commit further acts of malfeasance or do both,” saad ng desisyon.