Talakerang female celebrity wagas ang kaartehan, lahat na lang pinakialaman

KALAT na kalat na ang sobrang kaartehan ng isang female personality na palaging inirereklamo ng kanyang mga katrabaho. Walang nakasama sa trabaho ang babaeng ito na hindi nagkaroon ng mga kuwento ng kakuwanan ng nagkakaedad nang female personality.

Propesyonal kuno ang babaeng personalidad, pagdating sa oras ay wala talaga siyang sabit, pero ang kanyang kaartehan ay sobrang wagas.

Kuwento ng isang source, “Palagi kasi niyang hinahanap ang sarili niya sa ibang tao. Nagkukumpara siya palagi. Mahilig siyang magsabi ng kung anu-anong comparison.

“Kunwari, na-late ang hairdresser niya, ang sasabihin niya na agad, ‘Trapik? Umalis ka dapat sa house mo nang madaling-araw. Para hindi ka nale-late!’

“E, hindi naman kasi lahat ng tao, e, katulad niyang walang pinoproblemang kakainin sa araw-araw, may pamilyang inaasikaso muna bago mag-report sa trabaho.

“Palaging mainitin ang ulo ng babaeng ‘yun, konting bagay lang, aangat na agad ang voice niya, hanggang sa makapagmura na siya,” napapailing na chika ng aming impormante.

Mapalad siyang nakukuhang nag-eendorso ng iba-ibang produkto. Marami palang kuwentong kakambal ang pagtatrabaho niya.

Isang source naman ang nagsabi, “Naku, mahirap siyang katrabaho dahil lahat ng bagay, e, may katumbas na amount para sa kanya. Lahat-lahat talaga, may sinasabi siyang halaga.

“Kapag nagandahan ka sa shoes niya, sasabihin na niya agad ang halaga nu’n. Ang palagi niyang sinasabi, namumuhunan siya sa career niya. Kumbaga, kina-career niya talaga ang career niya.

“Kapag may katrabaho siyang hindi kagandahan ang make-up kit, sasabihin niya agad, ‘This is your career, kailangang paghandaan mo. Mamuhunan ka, para may mga nagagamit ka.’

“Pakialamera siya, sa totoo lang, pinanghihimasukan niya ang buhay ng may buhay, hindi na lang niya pakialaman ang ulo niyang konting kibot lang, e, mag-iinit na agad!

“Buti nga, hindi siya ihinuhulog sa imburnal ng mga natatapatan niya, di ba naman, Bradly Guevarra at Tita Nene Ulanday?” pagtatapos ng aming source.