Kilalang aktor may ‘sakit’ kaya ayaw nang kunin ng producer at direktor
PANAY ang kulit ng aktor sa kanyang manager kung anong bagong project ang nakuha nito para sa kanya.
Ang tagal na raw kasi niyang walang ginagawa na parati namang sinasagot ng manager ng, “Wala pa, lagi naman kitang inilalako, pero wala, eh.”
Noong mga nakaraang taon kasi ay kaliwa’t kanan ang project ng aktor, pero dahil sa ugali niya kaya nagsawa na sa kanya ang mga direktor na nakakatrabaho niya at maski na gusto siya ng mga producer kapag ayaw ng direktor ay wala siyang magagawa. Ending papalitan na lang siya.
“Lagi kasi niyang sinasabi na magbabago na siya, hindi na siya male-late sa set, e, hindi naman nangyayari. Sa umpisa, pakitang-gilas, hindi nale-late sa call time, pero sa kalaunan ‘yung isang oras na late naging dalawa hanggang tatlong oras na.
“Tapos, wasted pa pagdating sa set, hindi makamemorya ng script kasi wala pa raw siyang tulog o kulang sa ewan,” kuwento ng isang taga-production na ilang beses na ring nakatrabaho ng aktor.
Nanghihinayang din naman ang ilang taga-showbiz sa career ng aktor dahil marunong naman talaga itong umarte at mabait pa, hindi lang talaga siya maaasahan pagdating sa oras dahil lagi nga siyang late.
“Hindi lang naman siya ang artista, siyempre naiirita sa kanya, hindi lang nagsasalita kasi siya ang bida, malaki ang pangalan niya. Pero maski na magaling siya, kung ganyan naman ang ugali niya, talagang hindi siya kukunin. Maraming puwedeng pumalit sa kanya ngayon,” sabi pa sa amin ng source.
At dahil walang maibigay ang talent manager na proyekto sa aktor ay kaagad itong nagsabing kukuha siya ng ibang manager na ikinaloka ng una.
Dinig namin ay naghahanap na ng bagong manager ang aktor, balitang may nilapitan siya nu’ng una pero tinanggihan din siya at ikinatwiran na marami na siyang alaga at hindi na kayang magdagdag pa.
Nakakaawa naman ang aktor dahil kahit malaki ang pangalan niya ay wala nang gustong kumuha sa kanya.
Read more:
Marlo ibinibigay sa tatay ang lahat ng talent fee
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.