Rochelle pinaglilihian si Arthur: Ayoko siyang makita!

KUNG napapraning noon ang Onanay star na si Rochelle Pangilinan kapag naiisip niya ang pagbubuntis dahil takot siyang ma-experience ang “morning sickness”, iba na raw ngayon.

“Kahit anong sakit, kung anuman ang pagdadaanan ko para mailabas ko lang itong baby na ito, parang gagawin ko. Ganu’n na ako, parang magic na nawala bigla ‘yung takot ko,” sey Rochelle sa panayam ng GMA.

Kampante na raw siya ngayon dahil sa pagmamahal at pag-aasikaso sa kanya ng asawang si Arthur Solinap, “Dahil sa morning sickness ko, hindi ko na kayang magluto at gumuwa ng kung anu-ano, siya lahat. Inaral niyang maglaba, magluto kung ano ‘yung kailangan iluto, siya ang nag-aalaga sa mga aso, siya na lahat na dati ako ‘yung gumagawa.”

Pero mukhang si Arthur nga ang pinaglilihian niya ngayon, “Ayoko kasi talaga siyang makita kahit alam kong nahe-hurt siya. Naiinis ako ‘pag hawak niya ako pero kapag hindi ko nakikita ‘yung noo niya at ‘yung mata niya, ako naman ang naghahanap sa kanya.”

Samantala, tuloy pa rin naman ang pagte-taping ni Rochelle para sa GMA Telebabad series na Onanay bilang BFF ni Onay (Jo Berry). At kapag kailangan niya munang magpahinga para sa nalalapit niyang panganganak, magpapaalam muna siya pansamantala sa Onanay.