NASAWI ang isang 15-anyos na binatilyo matapos umanong gulpihin ng kaeskuwelang 16-anyos sa kanilang paaralan sa Victoria, Oriental Mindoro, inulat ng pulisya Biyernes.
Itinakbo pa sa ospital ang 15-anyos, ngunit di na umabot nang buhay, sabi ni Supt. Imelda Tolentino, tagapagsalita ng MIMAROPA regional police.
Nasa kostudiya na ng mga awtoridad ang 16-anyos.
Naganap ang insidente pasado alas-4, sa Aurelio Arago National High School ng Brgy. Leido, kung saan grade 7 student ang nasawi at grade 10 naman ang 16-anyos.
Sinabi sa pulisya ng isang grade 9 student na nanonood siya ng mga kaeskuwelang naglalaro ng badminton at volleyball, nang dumating ang 16-anyos at pinagpapalo sa ulo ang 15-anyos.
Dahil dito’y bumagsak sa sahig at nawalan ng malay ang 15-anyos, ani Tolentino, gamit bilang basehan ang ulat na nakarating sa kanyang tanggapan.
Nagsagawa ng hot pursuit operation ang Victoria Police nang matunugan ang insidente, hanggang sa matunton ang 16-anyos.
Dinala sa lokal na istasyon ng pulisya ang 16-anyos, bago ang pag-turn over sa kanya sa Municipal Social Welfare and Development Office.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.