Jessy pasok na rin sa Probinsyano: bida o kontrabida?

PANIBAGONG mukha muli ang napapanood gabi-gabi sa pagpasok ng karakter ni Jessy Mendiola na magpapaigting sa puwersa ng Vendetta sa FPJ’s Ang Probinsyano.

Ginagampanan ni Jessy ang karakter ni Andy, isang medical doctor na tumulong na gamutin ang sugat ng miyembro ng Vendetta matapos ang engkwentro ng grupo sa kampo nina Hipolito (John Arcilla) at Alakdan (Jhong Hilario).

Karagdagan nga ang Kapamilya actress sa listahan ng mga malalaking bituin na naging parte ng bagong yugto ng serye. Natunghayan na rin kamakailan sina Dawn Zulueta, Alice Dixson, Rowell Santiago at Edu Manzano na gumaganap bilang mga maimpluwensyang pamilya na nakatakdang maging katunggali ni Cardo (Coco Martin).

Sa pagpapatuloy ng kuwento, lubos na ang pagpupunyagi nina Hipolito at Alakdan matapos nilang pulbusin ang Vendetta, at puruhan pa ang pinuno nitong si Romulo (Lito Lapid). Ngunit sa aktong ililigpit na ng mga pulis ang bangkay ng mga namatay, nagulat ang lahat ng ideklarang buhay pa si Romulo at nakaligtas mula sa pamamaril ng mga kalaban.

Ang pagkabuhay kaya ni Romulo ang tatapos sa kasamaan ni Hipolito?

Tutukan ang FPJ’s Ang Probinsyano, gabi-gabi sa ABS-CBN.