Gilas Pilipinas dinaig ang Chinese-Taipei
NAUWI ng Gilas Pilipinas ang ikalawang panalo sa FIBA World Cup 2019 Asian Qualifiers matapos talunin ang Chinese-Taipei, 90-83, Lunes ng gabi sa Smart Araneta Coliseum sa Cubao, Quezon City.
Naging mahigpit ang labanan ng Pilipinas at Chinese-Taipei sa halos kabuuan ng laro bago nagawang kumalas ng mga Pinoy cagers sa huling anim na minuto ng laban para maitakas ang panalo.
Maagang napag-iwanan ang Gilas Pilipinas sa 14 puntos sa kaagahan ng laro, 3-17, bago nagawang makalapit sa 18-23 sa pagtatapos ng unang yugto.
Nagawang rumatsada ng mga Pinoy cagers sa ikalawang yugto para agawin ang kalamangan sa 28-27 mula sa layup ni Kiefer Ravena bago isara ang first half na hawak ang 44-42 bentahe mula sa dalawang free throws ni Andray Blatche.
Nakalayo naman ang Gilas ng pitong puntos, 58-51, may 3:51 sa ikatlong yugto bago idinikit ng Chinese Taipei ang iskor sa 65-64 papasok sa ikaapat na yugto.
Pinamunuan ni Jason Castro ang Gilas sa itinalang 20 puntos.
Nanguna naman para sa Chinese-Taipei si Quincy Davis III na gumawa ng 20 puntos.
Makakaharap naman ng Pilipinas sa susunod nitong laro sa World Cup qualifying tournament ang Australia sa Pebrero 22, 2018.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.