Kinarma sa Miss International: Mariel de Leon isinumpa ng mga bakla kaya umuwing nganga

GRABE ang pang-iinsultong tinatanggap ngayon ni Mariel de Leon, ang kinatawan natin sa katatapos lang na Miss International, na hindi man lang pinalad na mapabilang sa Top 15.

Sa halip na malungkot ang mas nakararami nating kababayan sa pagkabigo ng dalaga ay puro pintas pa ang inaabot niya ngayon. Mukhang napabayaan daw kasi sa kusina si Mariel kaya namumutok ang kanyang katawan nang iparada na niya ang kanyang katawan sa entablado na naka-swimwear.

Lahat ng pisikal na pamimintas ay ipinatitikim ngayon kay Mariel, siya lang ang beauty queen na ginanito ng ating mga kababayan, dahil kapag natatalo ang Pinay sa ganitong labanan ay binibigyan ng pag-asa ng mga Pinoy ang ating kalahok.

Hindi nakaganda para kay Mariel ang madalas niyang pagbibitiw nu’n nang maaanghang na salita kapag nakikisawsaw siya sa maraming isyu ng bayan.

Lalo siyang pinupog nang magkomento siya tungkol sa paksa ng depresyon na ipinanghingi na ng tawad sa publiko ni Joey de Leon.

Maraming becki ang nagalit sa kanya, para siyang isinumpa ng mga ito na matatalo sa lalabanan niyang beauty pageant, nagdilang-anghel ang mga hindi nagkagusto sa pagiging brutal ni Mariel de Leon sa pagkokomento sa social media.