Uncategorized

Inimpeach ng Kamara de Representantes si Commission on Elections chairman Andres Bautista sa kahapon, naunahan pa si Supreme Court Chief Justice Maria Lourdes Sereno.     Sa botong 75-137 at dalawang abstention, nagdesisyon ang Kamara na baliktarin ang committee report ng House committee on justice na ibasura ang reklamong inihain ni dating Negros Oriental Rep. Jacinto Paras at Atty. Ferdinand Topacio dahil insufficient in form ito.     “The vote shows that the resolution is overridden and pursuant to section 11, Article 3 of the rules of procedure in the impeachment proceeding, a vote of at least 1/3 of all the members of the House shall be necessary to override such a resolution in which case an I am directing the committee on justice to prepare the Articles of Impeachment immediately, so ordered,” ani House deputy speaker Raneo Abu na siyang presiding officer ng sesyon kahapon.       Kailangan lamang ng 98 boto o one-third ng kabuuang 292 kongresista para ma-impeach si Bautista.     Tinutulan ni Surigao del Norte Rep. Robert Ace Barbers ang mosyon na aprubahan ang committee report upang marinig umano ang panig ni Bautista sa mga alegasyon sa kanya.     “I object to the committee report in order for the Comelec chairman be given an opportunity to explain, because it is perceived that there was some infractions that was committed by no less than the chair of the Commission and we never heard any reply on the accusations being hurled at him,” ani Barbers.     Gagawa na ang komite ng Articles of Impeachment na ipadadala sa Senado kung saan isasagawa ang Impeachment trial.       Kailangan naman ng two-thirds o 16 na boto sa 24 senador para masibak sa puwesto si Bautista.       Maaari naman na hindi na dinggin ng Senado ang impeachment case kung magbibitiw na si Bautista. Sa isang sulat sinabi ni Bautista na sa huling bahagi ng taon siya magbibitiw.     Kritikal ang taong 2018 dahil ito ang panahon ng paghahanda ng Comelec sa 2019 elections.