Ikatlong sunod na panalo target ng Blackwater Elite

Mga Laro Ngayon
(Araneta Coliseum)
4:15 p.m. TNT KaTropa vs Blackwater
7 p.m. Globalport vs Star
Team Standings: Blackwater (2-0); Rain or Shine (2-0); Globalport (1-0); NLEX (1-0); Phoenix Petroleum (1-1); TNT KaTropa (1-1); San Miguel Beer (1-1); Alaska (0-1); Barangay Ginebra (0-1); Meralco (0-1); Star (0-1); Mahindra (0-2)

IKATLONG sunod na panalo ang asam itala ngayon ng Blackwater Elite laban sa TNT KaTropa Texters upang makapagsolo muli sa liderato ng 2016-17 PBA Philippine Cup ngayon sa Smart Araneta Coliseum sa Cubao, Quezon City.

Agad na magsasagupa ang may malinis na kartada na Blackwater at ang TNT KaTropa sa unang laro ganap na alas-4:15 ng hapon habang susundan ito ng salpukan sa pagitan ng Globalport Batang Pier at Star Hotshots sa alas-7 ng gabi.

“We will do our very best to ride on our win streak and get another win versus TNT,” sabi ni Blackwater coach Leo Isaac matapos itala ang panalo kontra Phoenix Petroleum Fuel Masters (94-87) at Meralco Bolts (86-84) para sa kanilang best franchise start at unang pagkapit sa liderato sa kumperensiya sa liga.

“Ronald Pascual has been elevated to the regular lineup, Jason Melano down to the reserve list,” sabi ni Isaac na pangunahing pagkukunan muli ng opensiba si Mac Belo, ang best player ng Elite kontra Fuel Masters at Bolts.

Iiwanan ng Elite kung magwawagi sa Texters ang katabla sa liderato na Rain or Shine Elasto Painters, na kasama ang TNT KaTropa, ay isa sa dalawang koponang hindi pa natatalo ng Elite sa  dalawang taon nito sa pro league.

Isa sa matinding problema ni Isaac ang pagbabalik ni TNT KaTropa top gunner Jayson Castro mula sa dalawang laro nitong pagpapahinga.

Hangad naman ng Batang Pier na masundan ang 97-75 pagwawagi sa Mahindra Floodbuster habang pilit babawi ang Hotshots sa 88-96 kabiguan kontra sa two-time defending champion San Miguel Beermen.